Scrappetreff

Scrappelaurdag

Sist laurdag var eg i scrappebobla heile dagen. Eit djupdykk i fargeglede og kreativitet. Produksjon av kort og kalendrar og album. Treffet varte heile helga, frå fredag til sundag. Sjølv hadde eg meldt meg på til laurdagen. Nokre kjem frå bygdene rundt om og køyrer att og fram kvar kveld og stiller til ny dyst morgonen etter. Andre overnattar på skulen, på madrassar på klasseromma. Då kan ein scrappe utover natta og stå opp og scrappe vidare, neste dag. Ei intens helg. Noko av det kjekkaste er å prate med folk, sjå kva dei driv med. Nokre er nye og er interessert i å lære. Andre er vidarekomne og interessert i å lære bort. Ein finn likesinna kvar ein snur seg, lidenskapen for scrapping er i større og mindre grad til stades hos alle. Det er nok mange rundt i fylket som kan glede seg til å pakke opp heimelaga julegåver.

Nokre diesar eg stansa ut i løpet av laurdagen

Det som er litt dumt med desse diesane er at det er vanskeleg å få tak i nynorske utgåver. Det finst, men dei er så lite i bruk at butikken kjøper dei ikkje inn, då dei ville verte så dyre i utsal. Difor brukar eg helst slike som "God jul" og "Juleklem". Dei går både på norsk og bokmål.